وهج الكلم
السيد (كامل الدسم)..ادريس..!!
* برسل ليك يا سعادتك الليلة المقال رقم (4) منذ توليك منصب رئيس الوزراء وقبل أداء القسم …وان شاء الله تكون قريتم كلهم…لأنهم مهمين جدا…يا بروف حال السودان واجعنا وجع شديد …وحاله لا يسر….
* يبدو أنك داير تمشي في الاتجاه الغلط….الليلة مضي علي اداءك القسم اكثر من اسبوعين وما زلت متجولا في شوارع البور بين المقاهي وزنك السمك
افتكر كان كفاية زيارة مراكز الايواءات…وعلقنا ليك اعجابا بالزيارة واهميتها….افتكر كفاية زيارات… والشعب ينتظر منك قرارات وتكوين حكومة وغيره
مجرد طلتك الكتيرة بدون تنجز في تكوين الحكومة معناها انت كده مشيت غلط…ارجع سريع من الدرب ده.
* أسألك سؤال هل وجدت مكتب
لتدير عملك من خلاله ..حتي اليوم انت لم تجلس ولم تصدر قرارات صارمة في حق كتير من الامور البايظة بالبلاد …خاصة الفساد…تكوين لجنة للتحقيق في فساد الحج خطأ فادح
اصدر قرارات صارمة باحالة كل العاملين بالحج للصالح العام وحل كل اللجان الدائمة وتقديمهم للمحكمة الفورية وهذا من صميم عملك وحقك قبل أن يقول القضاء كلمته.
* تكوين لجان للتحقيق كلام (فارغ ساي).. السيد البرهان كون لجان وجات النتيجة بتبرئة ساحتهم….رغم انه مسئول الحج اساء لمجلس السيادة وقال يومها امشوا اشتكوا وانا ما بخاف من اي زول مهما كان
…طبعا مافي زول بخاف من زول ولا ده المطلوب لكن مطلوب الاحترام واحترام سيادة الدولة امر مهم.
* فيا سيادة كامل ادريس عليك باخذ الأمر مأخذ الجد فالزمن ليس من الصالح …وكل يوم يمر عليك دون جديد …يزعج الشعب ويضعف من حماسه ودرجات تفاءله تجاهك …وبذا كل يوم تفقد أهمية ويبقي تقييمك اقرب للفاشل حمدوك .
* الفرصة سانحة سعادة الرئيس ..ويمكنك تدارك الموقف سريعا …أوقف الزيارات والجولات فهذه لها زمانها ومكانها يوما لاحقا بعد تكوين حكومتك وترتيب شأنك …حينها تحتاج الزيارات وتحتاج المتابعة والملاحقة والعقوبة الرادعة الفورية لكل من يقصر
ويتباطأ في أداء مهامه التي يجب أن يؤديها.
سطر فوق العادة
السيد البروف كامل ادريس او كما يحلو لي مناداته ب(كامل الدسم) لانه يتمتع بصفات عديدة غنية ومفيدة (بس خت الكورة واطه)…اوريك حاجة اخيرة انت عندك خطة واضحة ورائعة اكيد طالما وضعتها في كتيبين مشاكل وحلول ..ابدأ ياخ منتظر شنو؟ امشي الخرطوم ودور شغلك من هناك وخليك قريب من (الشرطة النيابة والقضاء…) شوف كان تنقدر.
(ان قدر لنا نعود)
